بو أحمد: في الديوانية جلس جنبي أحد زملاء الدراسة في الستينات، عضو فاعل في غرفة التجارة، فقال لي: شللي قاعد يصير، ليش يحاربون غرفة التجارة؟ شسوينالهم؟ ليش هذي الحملة علينا؟ فضحكت وقلت له: كانت الغرفة والتجار عايشين بين المايتين، ما أحد يشوفهم ولا أحد يحس باللي هم يسوونه من تدخلات في الحكومة ومجلس الأمة، لكن الله يهديه ويصلحه مرزوق الغانم، رئيس مجلس الامة السابق ما خلى أحد ما حاربه، نفخ في الغرفة ونفوذ الغرفة وبيّن ان الغرفة تحكم وتتحكم في كل مفاصل الدولة، فشبت كل الليتات على الغرفة ولفظتها الحكومة ومجلس الأمة والشعب الكويتي كاملاً.
