جريدة الشاهد اليومية

الأربعاء, 01 مايو 2019

حكيم روحاني حضرتك؟ «2-2»

لكل فعل رد فعل يساويه في الشدة، ويعاكسه في الاتجاه هذا اللي نعرفه فلا يمكن ان يتم الاعتداء مني والطريج لابد من تحقيق ووجود مشرف اداري يحاسب المقصر، بعض الدكاترة يعاملك كأنك داخل بيته بالقوة وحاطين لوحة كبيرة عن عقوبة اللي يعتدي عليهم وما في عقوبة اللي يقصر بشغله، صحيح ان بعض المستشفيات عليها ضغط والدكتور ايضا بني ادم لكن له حالات معينة واجب انه يستقبلها وواجب من حبه لمهنته ان يتعامل بالحسنى وبابتسامة عالاقل، بذمتكم شفتوا دكتور يبتسم ينطق؟ لا طبعا..شفتوا واحد يتحجى بلباقة وأدب ونفسه حلوة ينهان؟ لا طبعا الا ماقل وندر! لكن اللي يتعامل بفوقية وعنجهية وتكبر وأخلاق سيئة وما يراعي مشاعر المريض اهو اللي يتعرض للاهانة ودايما الكل يستفسر اشمعنى جنسية معينة اهيا اللي تشتكي هل يفتعلون المشاكل لأجل التعويض المادي او يحبون يسوون دراما ومشاكل بس والا شمعنى باقي الجنسيات مانشوف لها حس ! مع العلم دكتورة م.البحر كويتية كانت،عموما اهي اخلاق مالها خص بالجناسي بس هذا الملاحظ اللي ماعنده اخلاق محد يتحمله لا الصاحي ولا المريض،احنا طبعا نستنكر هذا الفعل المشين وهو الاعتداء على كادر طبي او اي انسان يقوم باداء عمله لكن ايضا لا يتحجج بهالذريعة ولا يحاسب على قصوره سواء بالتعامل او بأخطائه الطبية عطونا خطأ طبي واحد تم محاسبته ؟؟ ماكو طبعا مع احترامي للبعض اكثر الأطباء يستفزون المراجعين،  عشان الملصق السجن 6 شهور أو غرامة 500 دينار ويضمن الـ 5001 كتعويض وياريت كل دكتور تتكرر معاه هالمشكلة يعيدون النظر في امره وابعاده فورا عن البلاد او توقيفه ومحاسبته لان بيكون اهو النجري واللي يدور الفلوس،البعض تجرد من شرف هالمهنة الانسانية واذا ماخاب ظني مزور شهادته او ما يستحق يكون دكتور، مع احترامي للاطباء الكرام الذين درسوا وتعبوا وتعلموا وسهروا حتى يساعدوا هالمرضى واللي يستحقون كل تقدير واحترام عاللي يقومون فيه من تفاني وجهد لمساعدة المرضى باهتمامهم وحرصهم وحبهم ومراعاتهم لمشاعر المرضى واهاليهم،شكرا لكل طبيب يقوم بأداء واجبه على اكمل وجه وبمحبة وابتسامة .وكحال اي مهنة في زمننا هذا يجب اعطاء الدكاترة والطاقم الطبي دورات في حسن التعامل مع المرضى والابتسامة ودورات في ادارة الشدة تفيدهم حتى بالحياة والله يساعد المرضى على نفسيات بعض الدكاترة اللي ما عندهم اخلاق وجنه بايقين من حلال ابوهم واطالب وزارة الصحة بوضع مشرفين اداريين لمحاسبة المقصرين ومتابعة سير العمل ووضع صندوق اقتراحات وشكاوى والنظر بجدية لمستوى الاداء والتقييم وربطه بمعاشاتهم ووضع عبارة التمسوا لهم العذر والغرامة على الصوبين في حال الاعتداء.

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث