جريدة الشاهد اليومية

سميح القلاف

سميح القلاف

الأحد, 28 ديسمبر 2014

راحت سنة

الله اشكثر السنين اللي بفضل الله عدتنا لتحتل بدلها سنين جديدة وتصبح القديمة ذكرى مؤلمة او سعيدة لانها تسحب اعزاء معاها كانوا بيناتنا واختفوا منهم اباء اخوان امهات اصدقاء يا يتمون يحتفلون معانا بنهاية السنة يا ينتهون قبل نهايتها، فيا جماعة كم سنة احتفلتم برحيلها وشلون كانت معاكم، خلونا نرجع بالذكريات نبدأ من رياض الاطفال اللي كانوا على ايامنا ينومونا ومانرد لبيوتنا الا العصاري نوم اجباري بالروضة وبعدها ندخل المرحلة الابتدائية يسلمونا ملابس ودفاتر ويعطونا اكل ويدرسونا صح، المدارس قبل احسن من اليوم رغم التكنولوجيا اللي ردتنا قرى باسم العلم فكان الناظر ايامنا يجحش الطلبة الهاربين والكسالى والمشاغبين بالطابور والاباء يفرحون لان الوزارة اسمها التربية والتعليم، بس يوم صارت بس تعليم خربت، المعلم اللي كاد ان يكون رسولا اليوم اللي بأمه خير يعاقب طالب لان البعض يظنون ان اولادهم ملائكة ممنوع الاقتراب والتصوير منطقة محظورة، عادي لان هالاباء يطبقون المثل الشاذي بعين امه غزال،  ما علينا نرد للسنة اللي بقى لها جم يوم وتودعنا شللي صار واستوى فيها بهالديرة، خطة التنمية اشصار عليها بعد هبوط اسعار النفط والحمد لله شالوا قرار زيادة اسعار البنزين وانشالله ما يشيلون بدل الغلاء مثل ما سمعنا انهم بيخفضون رواتب العاملين بالنفط  وبيسوون وبيسوون وكل اللي بيسوونه فيه ظلم لمحددوي الدخل، وحسب ما وصل لنا على لسان احد الشيوخ ان معاش الوزير ما يزيد على 2500 شهريا وهو وزير وندري ان الخبر لك عليه بس لو نفرض انه صح وخريج الثانوية العامة بالنفط ياخذ 3000 او اكثر جذيه ظلمنا الوزير اللي يداوم صبح وعصر وو وما ياخذ بدلات اذا الوزير ما ياخذ من ياخذ؟ امي؟  الله يحفظها. في امور كثيرة يا أهل الحل والربط ممكن توفرون منها بيزات وتعوضون شوي من خسائر بيع النفط هذا اذا فيه خسائر بالاصل فاسعار النفط بيد الاوبك والاوابك ترفعه وتنزله بوقف الانتاج والابتعاد عن السوق السودا والمقايضات، ومثل ما نسمع عندنا غاز يحترق وتفكرون تبيعونه، لا تفكرون، بيعوا عشان لا تسدون الخسائر من ظهور  المتقاعدين والمواطنين الكحيانين لا تناشبونهم على علاوات ومكافآت وبدلات بفرض ضرايب، والله الكويتي ما يستاهل حنا ما نتابع شيصير بالدول اللي حوالينا لان حنا بديرتنا افضل منهم  بامور كثيرة والناس حاسدينا حتى على مجلسنا اللي موعاجبنا لان الديمقراطية وحرية الصحافة والنقد البناء بديرتنا موجودة بس عند بعض الدول من الكبائر، ممنوع، وهذه بروحها نعمة عندنا ولكن الاصابع ما هي سوا عند بعض الناس للاسف  اللي اقدر اشبهه بالدياي لان المثل ينطبق عليهم الدياية تموت وعينها بالسبوت فهالناس ما تشبع مثل هالدياي مع انها بخير ونعمة وعندها فلوس لو تنوكل بثلاث وجبات ما تخلص بس شنقول غير ان هالفئة دائماً تقول هل من مزيد، تجمع للورثة ناسية ان رسم ابتسامة على وجه محتاج تسوى الدنيا وما فيها، فقبل لا تروح السنة  فكروا اشسويتوا فيها غير الاحتفالات بقدومها وذهابها اشسويتوا للديرة اللي عطت وعطت وفكروا باللي اخذتوه اظن يكفي خلو شي للاجيال القادمة، فيا أهل الحل والربط فكروا بسلبيات السنة اللي بتنتهي وسووها ايجابيات بالسنة الجديدة. الناس العالة على البلد اللي ماخذين وظائف اهل البلد مشوها، عينوا كويتيين بالمكاتب الخارجية والسفارات والمكاتب الصحية بدل لا تنفعون الا جانب، عدلوا مخرجات التعليم من احتياجات لا تكدسون موظفين بدون فايدة وعايدة، طبقوا العقاب على المقصرين وكافئوا المنتجين  بالسنة الجديدة، ندري ما تقدرون تشيلون الواسطة ولكن على الاقل خلوها للي يستاهل، للمحتاج بدل الاقربون حتى لو كانوا هالاقربون ميح قواطي فوق فلا تعطونهم اماكن اللي تعبوا ودرسوا ويبون يخدمون البلد بس مو معطينهم فرصة، ما يكفي ان الوزراء محسوبين على بعض العوائل والدواوين فديرتنا كلنا نعرف ان ولد الطبيب يصير طبيب والضابط ضابط والممثل ممثل وو.. غيروا بالسنة الجديدة هالاسلوب وحطوا الرجل المناسب بالمكان المناسب.المهم قبل لا تنتهي السنة حبيت اقول لكم اتمنى السنة الجديدة تكون سنة  خير على أمة الاسلام اولا، وعلى ديرتنا وشيوخنا وشعبنا ثانيا، سنة تكون فعلا سنة انتاج وتخطيط وقوانين صح تصب بصالح الديرة والمواطنين وتكافح الجريمة وآفة المخدرات، سنة تكون مرسومة صح بالتنمية ما تخلي مشروع بو سنتين ينمط وما يخلص  بعشر سنين وفيه مليون عيب، وخلوا التربية قبل التعليم والتجنيد الالزامي ابعدوه عن الواسطة وخلوه للكل مو ناس وناس، حتى البنات علموهم الاسعافات الاولية  والاتكال على النفس وبسكم من العمالة اللي خلتكم اتكاليين وربادية. الشاب هالايام لو تبنشر سيارته يقف له وانيت او تاكسي يسوي البنشر بفلوس عشان لاتحترق اصابيعه او تتسود، ماقول الا مالت على البامية ام... وكل عام جديد وانتو بخير عساها سنة خير احسن من اللي ولت وربي يحفظ الكويت بشيوخنا.. قولوا آمين؟

الأحد, 21 ديسمبر 2014

حنا ليش سلبيين؟

عجبني موضوع طبي تابعته بأحدى القنوات الفضائيه يتكلم عن الطاقه السلبية بالانسان وتأثيرها على حياته ومن الأمور الغريبة اللي له دور بهالطاقه هو موقع السرير بغرف النوم لان له دور كبير في تنظيم امور الحياة والتخلص من هالطاقة السلبية اقول لكم اشلون يقولون العلماء ان وضع الرأس اثناء النوم من جهة الشرق «لازم بوصلة» يكون مناسباً خاصة للعوانس والعزاب، فهو يمنح صاحبه النوم المريح ويعطيه الطاقة ونشاط في التفكير وممارسة الحياة بشكل سلس، عكس وضع الرأس بالنوم جهة الغرب لانه يسبب النوم المتقطع والخمول والكسل وتقلب المزاج، فيعطيكم ام الطاقة السلبية، اما وضع الرأس اثناء النوم جهة الشمال فهي الوضعية المناسبة جدا للمتزوجين لان هالوضعية تمنح الطرفين الحب والرومانسية والتآلف والقوى لكن اذا وضع الزوجين رؤوسهم جهة الجنوب ياويلتي ويلتاه راح تسبب لهم هالوضعية النفور والفرقة وكثرة المشاكل ويمكن توصل للطلاق هذا بالنسبة لوضع السرير واتجاه الرأس اثناء النوم واعتقد الغرب من هالطاقة اخترعوا السرير الدوار عشان الانسان بتمر عليه كل الاتجاهات النومية فيقعد ويلقي طاقاته متخزنة داخله بعضها ببعض فيوم يكون زين ويوم معصب واحيانا هالامور تمر عليه باليوم اكثر من مرة وخاصة حنا الكويتيين لان حياتنا صارت اغلبها سلبية نعيش بتشاؤم وملل نخاف من المستقبل اذا مو مستقبلنا مستقبل عيالنا فالمجلس انتخبناه ووصلنا اللي نبيه للكرسي وتذمر منه ونعيد الكرة وهلما جرا بالجرايد نسمع عن مشاريع حلوة ولكن تنفيذها سلحفاة اللي نسمع عنه صار بالدير حوالينا بسنتين عندنا بعشرين سنة ليش ماكوا متابعة وحساب نسمع بيقضون على مشاكل الازدحام، والازدحام كل يوم يزيد وما يقل، وين القطارات ومتى بتصير وين الباصات، ليش مانتسنع مثل بعض الدول ليش ماتصيرون مثل لندن واوروبا ليش المسؤولين ماراحوا وشافوا غير هذا ترستوا الديرة تكاسي جوالة ومحد يركبها وياكثر حوادثها، طاقات سلبية ماتخلص والعجيب من يومين سمعت ان كل واحد يبيع بيته يحق له تقديم طلب بيت من الاسكان و.و. والمصيبة له اولويه فبدل لاتخففون تزيدون الطلبات من غير ماتعرفون ليش باع بيته واش سوى بالفلوس واللي ناطرين سنين ينطرون شوراهم وبعض اولياء امور المعاقين موزعينهم بمناطق بعيده وعيالهم يدرسون بحولي ذول اذا اسكنوا وين يدرسون عيالهم بنفس المكان وشلون يداومون واذا لهم باصات الساعة جم يمرون عليهم اربع الفجر امور تخلي حياتنا سلبية ولاتشم الايجابية الساعة القرارات اللي نسمعها كل يوم زيدوا البنزين حقكم سووا ضريبة هم حقكم بس نبي نشوف شي بالمقابل شي ملموس علاج زين شوارع فاضية مناطق متكاملة نبي كويت الثمانينات يضربون فينا المثل يغارون منا مو مثل اليوم جيرانا طايفينا وسبقونا صرنا حنا مثل تكرمون حمير البصرة قومه من غير خط ليش صرنا جذيه ليش الله يهداني انا ليش صرت سلبي ليش؟

السبت, 20 ديسمبر 2014

أسألكم الدعاء

ممكن اطلب منكم طلب وهو تدعون لي  بان يشفيني ربي ويردني سالم لعيالي بعد ان تمت عمليتي بنجاح بازالة ورم بالرئة بنجاح،  الحمد لله كتب ربي لي السلامة ومازلت بمرحلة التاهيل لاستعادة عملية التنفس العادي قبل الالتئام التام بالرئة واعتقد هذا جواب لسؤال القليل من القراء ويقولون ليش ماتكتب.. انا الحين اكتب والاكسجين على خشمي جنه ياهل معلق، والحمد لله مو بس انا وايد  مثلي  يحبهم ربنا ومبتليهم بالامراض واتمنى لهم الشفاء المرض تخفيف ذنوب وعذاب والخوف مو من الموت لانه حق واللي اسبقوني ماني احسن منهم ولاني الاول او الاخي? ولكن اللي يخوف العلاج الكيماوي والاشعاع فاطلبكم تدعون لي بان علاجي لايوقف بنص الطريق فالطريق مثل ماحصل للبعض بهيوستن معلقين جناط الكيماوي بخواصرهم جنها كاسور عراقي والوايرات طالعة من بطونهم ويقولون لهم مبروك وقفوا علاجك او جانا رفض على التمديد  تعال بعدها رقع مع السفاره اللي غصب يردون عليك واذا ردوا قالوا اللجان بالديره هي اللي مادزت لنا وبالديره يقولون ماوصلنا شي من أميركا ويخلون المريض يعيش بقلق وتوتر وهم يدرون ان نصف الشفاء يكون نفسي بس من يطبق وياجماعة القلق هو ابو المرض ولكن شلون نبتعد عن هالقلق فهل ?ن معين يعيننا، طبعا حتى لو انت تفاقق بتموت اذا ماعندك واسطة تمشي امورك او ماتعرف واحد بالسفارة وبالمكتب الصحي يحرص على ارسال تقاريرك والاهل بالديره يتابعونه، لاحول ولاقوة الا بالله حاشنا القلق.. وحنا ودنا نطيب ونرجع لاهلنا وربعنا وديرتنا بعد غياب مو قصير فادعوا لي ياللي تتابعون هالزاوية وانتوا ياللي حاسدين الفقير على موتة يوم الجمعة وتظنون ان اللي يتعالج برة عيار ما فيه شي، صج الاصابع مومتساوية ولو خليت خربت، وفي ناس تحتاج علاج وللاسف ماقدروا يكتبون على شواهد قبورهم قلت لهم مريض وماصدقوني فارحموا من في الا?ض يرحمكم من في السماء فالديرة ماقصرت تبعث للعلاج بعدة طرق صحه دفاع مبرات و.. و.. ولكن اللي يقهر هو التمديد الشهري للمريض مع ان التقارير تذكر مدة العلاج الكيماوي والاشعاع فليش تخلون المريض يقلق ويحاتي كل شهر وهو لوبيده يفتك من هالكيماوي واعراضه الجانبية، والله لا يبيلي الصديق ولا العدو قولوا آمين.. لاتخلون المريض ضايع ما بين المكتب التابع للمستشفى واللجان الصحية للصحي او الدفاع بالسفارة واللجان بالكويت عاملوهم مثل البترول فمكتب المسؤول عن علاجهم بلندن وامور المرضى ماشية  بدون قلق.. اللهم لاحسد وكلنا مرضى كو?تيين.

الإثنين, 15 ديسمبر 2014

كيفي أنا كويتي

هالجملة زمان كانت تردد على لسان الرجل والحرمة ومن مختلف الاعمار وللعلم تنقال ووزنها يعادل ثقل نقطة باخر الجملة يعني ماكو رد وراها ولها مفهوم ثاني وهو مو شغلك اوضح اكثر، بيوم وانت تتمشى بالواجهة وطبعا في اماكن مخصصة للمشاة بس للاسف احيانا  تستغل من بعض اصحاب السياكل اللي ياخذون راحتهم بازعاج خلق الله فاذا قلت لاي واحد يالخو يالطيب، هالمكان مو للسيكل يرد بسرعة كويتي وكيفي، والعجيب هالجملة انقالت وايد بالثمانينات ايام عز الديرة وتفوقها بكل المجالات وللي للاسف اختفت بعد الغزو وماقمنا نسمعها لان في مثل يقول ماطار طير وارتفع الا كما طار وقع والكويتي اللي كان يفتخر انه كويتي ويتباهى بالانجازات اللي خل البعض ينظر للبشر اللي حوالينه بانهم اقل منه قدر وهلبعض للاسف تناسى الجملة المكتوبة على قصر السيف لو دامت لغيرك ما وصلت اليك، وهالشي عرف لبعض مواقعهم  من الاعراب وعرف ان التعالي على البشر مو زين، فرحم الله من عرف قدر نفسه، فعصر الرفاهية مو قالوا لنا انتهى، او راح ينتهي مع ان حنا مقارنة ببعض الدول نطوفهم بسبع شبات بالغنى اللي خلت عيون ماصلت على النبي تنظر لنا وتحسدنا ومن يومها محنا مترقعين فالحكومة اللي فتحت جيوبها للمواطن تحسفت وكانها عطته بمنة او من غير دراسة ولان حنا اعتمادنا على البترول اللي سعره في انحدار مانقدر نقول الا الله يستر فاليوم نسمع ان قوانين كثيرة اطلعت ماهي من صالح المواطن الفقير ولكن مافي بالمقابل قوانين ضد التجار اللي منتفين هالمواطن اللي يسمع ان ديرتنا ديرة الخير توزع على دول فلوس بالهبل وناسية شعبها  وشعبها مايدري ان هالمساعدات اللي توزعها الديرة هي سبب بتجمع العالم لتحريرنا من الكاولي، والديرة ماهي مقصرة لان حنا بعد مقصرين تجاه الوطن فالموظف وده يقعد بالبيت وياخذ معاش من غير جهد يعني مو محلل، والحرمة تبي تكشخ بماركات فتشتري جنطة بسعر معاشين وتقول معاشاتنا قليلة ماتكفي صح ماتكفي لانها مامدت رجلها قد الحافها حنا مبذرين مانحسب القرش الابيض مثل مايقولون لليوم الاسود  ونقول اصرف مافي الجيب يأتيك مافي  الغيب  و.. و، ونلوم الحكومة صح عليها ملام لانها اليوم تبي ترقع النقص المالي وهبوط اسعار البترول من ظهر المساكين مو يقولون بيزيدون البنزين  وبعض الرسوم و.. و، مع انها لليوم تعطي المتقاعدين ببعض الوزارات نهاية خدمة وبمقابلها تم تخفيض مخصصات المرضى بالخارج وودي اعرف من اللي اصدر قرار زيادة المخصصات ومنهو خفضها واذا بتساوون الكويتي بمرضى دول مجلس التعاون شي حلو ليش خليتونا انزل منهم ولهم امتيازات ماتعطونها المريض الكويتي سيارات توصل للمستشفيات وللمطار وحتى بمشاوير التبضع فالقطري مايدفع موقف ولا بنزين ولايستأجر سيارة و..و، اللهم لاحسد ساوونا معاهم ولاتذلون المريض وتعيشونه بقلق شهري وهو ينتظر تمديد علاجه مع ان التقارير توضع هو ياخذ علاج كيماوي فليش لازم تمديد شهري ترى مو المرضى اللي باقوا الملايين والله يعلم اشسويتوا لهم ولا انطمت السالفة  الله اعلم? الله ياكثر القوانين بديرتنا اللي تقر وتنسحب والمثل يقول كل اطراق بتعلومه بس حنا مانتعلم فالشيخ الشعراوي اللي يرحمه كان يقول:  «إذا رايت فقيراً في بلاد المسلمين فاعلم ان هناك غنياً سرق ماله»، وهذه حقيقة وحنا من بلاد المسلمين،واضيف حنا فعلا شعب مانستحي لان حنا نوصل من يمثلونا للكرسي وبعدين نضرب كف بكف ونتحلطم منهم نشتكي.

الخميس, 02 أكتوير 2014

ديرة قرارات

إلى الحكومة: ترى قرار المخصصات لمرضى العلاج بالخارج ما فيه ذرة انصاف وقرار ظالم وما اعتقد جاء بدراسة ليش ماساويتوا الرواتب برواتب الخليج قبل القرار ليش ماطبقتوا علاج المرافقين عشان نحس بالتسوية معاهم وليش مافكرتوا بنسب الغلاء بالدول اللي تبعثون لها المرضى هل بانكوك مثل المانيا ولندن هل الولايات الأميركية بولاياتها متساوية بالايجارات، فبدل لاتبهدلون المرضى كان من الاحسن توقفون الوسائط اللي فيها ظلم للمرضى اللي هم فعلا مرضى وصلحوا وضبطوا المكاتب الصحية اللي مطنشة المرضى يعني مكتب لندن قريب يوصلون له ويفشل من الزحمة وضيق المكان والمكتب العسكرى عكسه منظم بس الاطباء خرطي وأميركا لارئساء المكاتب يعبرون المريض ولا اصلا يردون عليه فاللي يتصل ويردون عليه بسرعة ينذر يذبح خروف، والمشكلة المريض يحتاج طيارة يوصل لهم، وتظل له صلة وحده وصل فيهم وهي مكاتب العلاقات العامة اللي يقولون انها تتعين من المستشفيات مافيهم خليجي ويتمننون علي المريض وجملتهم وحده مايردون علينا مكاتبكم حتى الايميلات مايردون عليها ولان فعلا المكاتب الصحية بالفعل ماترد على المريض فيصدق، اشياء كثيرة تحتاج تعديل حتى اللجان بالديرة تظلم والسبة بعض الاعضاء اللي يحرجون وزراء واذا مانفذوا هددوهم بالاستجواب الناس ماهي مدمقة تعرف ليش هالاستجوابات ومو الكل في قلة تفكر بالمواطن والوطن فيحاول يصلح لمصلحة الديرة اما الباقي يطبق الجملة الاقربون اولى بالمعروف والطوفان من بعدي ناسين ان اخرتهم متر بمتر هذا اذا ماندفنا وقافي لقلة الاراضي لانها مناطق بترولية تنتج خير البلد اللي يتصدر وبدل لايتبحبحون المواطن ينذل بمخصصاته، ابي اعرف ليش اللى قرر برفع المخصصات وساواها بمخصصات البترول للانصاف غير رايه وتحسف وخفضها اقل من قبل، ليش فلستوا؟ ولا بتدفعون للمستشفيات مديوناتكم بدل لاتحولون المرضى من المستشفيات الزينة للأسوأ بدل لاتجلسون تناقشونهم بالاسعار فالاشعة بالعيادات الخارجية سعرها 30 بالمئة اقل من سعر المستشفى فليش ماتسالون عن الاسباب بهالفروقات، فياوزير الصحة تدري بتحويلك المرضى لمستشفيات ثانية زت التكلفة وبتدفع فلوس من فلوس الديرة اللي فيها نسبة للشعب لانهم بعيدون كل الفحوصات مرة ثانية فانت بتكحلها عميتها وصرت لهم عين عذاري انت وديوان المحاسبة بس شنقول قرارات متسرعة بكلمة بنسوي جذيه يقولون صار ، وقبل لا اختم بعطيك هالنصيحة لك ولكل الوزراء زمان قالوا بالامثال ان أي انسان اذا يبي يتخذ قرار مهم وايد بشر وعند عشرة من الربع مو ربع النفاق او الطحالب لازم يشاور العشرة المخلصين له وطبعا ما اقصد بالربع ربع الحداق او ربع الديوانية لا الربع السنعين اخوان دنيا، فاذا وما عنده عشرة لازم يشاور خمسة من ربعه ولكن يشاورهم مرتين واذا ما عنده الا رفيج واحد لازم يستشير هالواحد عشر مرات بالامرواذا ماعنده صديق مخلص يشاور زوجته اذا يحبها وتحبه؟

نغزة:
سمعنا انه تم تشكيل فريق من ديوان المحاسبة والصحة والدفاع والداخلية وهم بأميركا الان يقولون انهم بيختارون ملفات عشوائية للمرضى يبون يعرفون من اللي جاي سياحة وشنو الامراض، وياليت يسوونها بكل الدول اللي يبعثون لها بس سمعنا.
 

الأربعاء, 01 أكتوير 2014

عقدة الكراسي

رئيس القسم الفني زارني بالمكتب وقال لي اكتب هذا المشهد اللي بقوله لك هو يمكن ماسخ بس انت ملحه وبهره باسلوبك وخليه جاهز للقراءة.
في بلد الحضارة مصر وبالمطار ركبت عجوز معاها خادمتها السيلانية الباص اللي يودي الطيارة عشان ترجع الكويت قبل العيد جو هي زايره بنتها تدرس هناك، المهم بعد ما امتلأ الباص حرك ووصل للطيارة ولان الحرمه كبيره بالسن وبمساعدة خادمتها صعدت اول الركاب مع الدرجه الاولى للطياره وشوي شوي تصعد الدرج يالله ياسيفه ليما وصلت تناهت فاستقبلتها المضيفه حلوه مثل وجهها حلوة واشرت لها تدخل للداخل ولكنها من التعب بالدرجه الاول قالت لخادمتها هذا خوش مكان خلينا نقعد هني وجذيه سووا واختاروا مكان لعرسان من الكويت رادين من شهر العسل، المهم بعد ماعفست الخادمه حوسه الاكياس ودعستهم تحت الكرسي حوسة خلينا نقعد هني.

قالت لها الحجية: قعدي يا حوسه خوش مكان حصلناه وسيع ويم الباب علشان ننزل بسرعة.
بعد ملا دخلوا ركاب الطائرة الدفعة الاولي جت المضيفة حق العجوز وقالت لها حجية ممكن اشوف التذاكر؟
الحجية عطتها التذاكر.
المضيفة: حجية انتي مكانك مو هني هذا المكان حق ناس غيرك.
الحجية: بس بابنتي انا حليته اول وهذا المكان جريب يم الباب وانا عجوزه ريلي تعورني هني اقدار امد الريل علي كيفي المكان وسيع.
المضيفة: بس يا حجية لازم تقومين تروحين داخل هذه كراسي الدرجة الاولى وانتي درجة سياحية.
الحجية:شالفرق داخل كراسي وهني كراسي نفس الشيء والا اللي داخل راح يطيرون قبلنا الطيارة كلها راح تطير بنفس الوقت.
المضيفة: شافت الحجية رأسها يابس نادت رئيس المضيفين اللي قال: يالله يا حجية قومي من هني وروحي داخل.
الحجية: ليش اقوم انا جيت اول وحليت المكان والا حتى بالكراسي عندكم بالواسطة ومخلينها حق ربعكم، انا ماني قايمه من هني يقول محجوز لصاحبه دامه محجوز ليس مابين لو هو يبيه جان صعد الطياره قبل الناس واخذه لا تلفون وتدورون معاي انا مرتاحة هني ومعاي خادمتي وما راح نقوم لاني اكدت الحجز قبل 3 ايام وتذكرتي عدلة، وهم بهالحوار حضر صاحب الكرسي وعروسته وشاف الحجية قاعدة مكانه قال لها يا حجية هذا مكاني.
الحجية: لاحول ولا قوة الا بالله الحين كل الكراسي الموجودة بالطيارة ما هي عاجبيتك ياي تاخذ مكاني اعنبوكم في الباص الرجل المحترم يقوم ويخلي الحرمة تعقد وانتو بالطيارات بالعكس تقومون الحرمة من مكانها حتى لو هي بعمر امكم.
المسافر يخز المضيفة اللي نادت الطيار وقال: يا حجية هذا المكان سعره اغلي من الداخل وهذا الريال دافع فلوس اكثر منك عشان يأخذ راحته فما يصير تاخذنه مكانه.
شوف انا جيت اول واحدة وحليت هذا المكان وما راح اقوم عنه وقولوا حق هذا اللي يبين عليه صاحبكم او من اهليكم يدور له مكان ثاني يقعد.
واشرت على الكرسي اللي علي يمينها وقالت: ليش ما يقوم هذا ويقعدون مكانه هذا هم درجة ما ادري شنهو سميتوها اما انا ما اتحرك.
الطيار: حجية يا تقومين عن الكرسي يا تنزلين من الطياره واحد من الاثنين، اسمع يا ولدي اللي ما تطوله بايدك واصله برجلك ما راح اقوم ولا راح انزل، هذا كرسي طيارة جذي وجذيه منخبصين لو كرسي وزاره او مجلس وتلومون اللي قاعدين على كراسي الوزرات والاعضاء لانهم متمسكين بكراسيهم لا ويمكن يحطون صمغ عشان يخافون من امثالك مايمهم الا يوزعون الكراسي لربهم او المقربين منهم اللي ما يستاهلون.
الطيار: اسمحيلي انا بهالحالة مضطر اجيب الشرطه ينزلونك والا ما تطير الطيارة.
العجوز: خوفتني هي طياره ابوك ماتطير هذه طيارة دولتنا وشكلك من منا محتر راوتي شتبي تسوي انا ما راح اتزحزح عن مكاني.
صاحب الكرسي يقول حق الطيار.
خلاص يبا انا اروح مكانها وخلوها قاعدة بمكاني بلا شرطة هذه كبر امنا.
الطيار: لا ما يصير هي اللي لازم تروح مكانها.
العجوز: الحين هو موافق يروح بالخلف انت لا تتدخل خله يروح ويا اللي معاه ويقعد ويفكنا والا شايفيي مره كبيره ماعندي والي بتضحكون علي.
المهم حتى لا اطول نهاية هالسيناريو تدخلوا بعض ركاب الدرجه الاولى والمعرس وعروسته قعدوهم بزنس لان الدرجة الاولى مليانة، وطبعا العروس ماتكلمت ولا كلمه بس هي منقهره واشكتر شايلة بقليها لوبيدها جان اسحبت العجوز وخادمتها وحذفتهم من بابا الطياره، بس هي ما تبي تبين حق زوجها من أول شهر ان لسانها طويل،الذكاء واجب في من هذه الحالات انتهى السيناريو ولاسف صار من زمان مو بيومنا هذا لانطياراتنا ماتصير فل واذا تعرف مضيف او طيار ممكن يحولك درجة اولى اللي يعطونك بالمسافات الطويلة dvd لان كل الاجهزة  تمشي على البركة ياكرسي طاير منه سبرنق يامو ثابت يا ماينزل اخ على ايامها قبل مدري ليش كل شي حلو زمان هالشي محيرني الناس بنت دول بدولهم وحنا بنينا مدينه الحرير بالحجي بشق هدومي؟

الثلاثاء, 30 سبتمبر 2014

صلحني بالخارج

وصلني خبر ان صاحبي نايم بالمستشفى مسوي عملية بس شنو مدري، ولان زيارة المرضى واجبة نشوف ربع من زمان ماشفنام ونحول غرفة المريض لدوانية، فبسرعة رحت الشويخ يم دوار شهرزاد وبمحلات اللي تبيع الاكل اللي باقي على انتهاء صلاحيته شهر وينباع رخيص وماكو رقابه فشريت لصاحبي الهدية ورحت له، وبصراحة من شفته كسر خاطري لان هالصديق من عمره «خفس» المصايب لاحقته لانه مواطن فقير ماعلينا قلت له: عسى ماشر علامك منت مترقع.
قال وهو يتنهد: دخلت المستشفى بعدما حاشني عوار بالخاصرة وبسرعة دخلوني غرفة العمليات وشالوا الدودة الزايدة وطلعت لان وايد تحوشهم الدودة ويتعالجون ويطيبون، ولكن العوار ما اختفى فرجعت لهم مرة ثانية فشالوا قناة الاثنى عشر وهم ما اختفى الالم فشالوا المرارة اللي لقوا فيها حصم اكثر من برصليبية والالم ما اختفى.
قلت: انت فاضي صرت هبان ماخلوا شي داخلك زين وايش سويت.
قال:هبان طبل تجيك السالفة من رد الالم قلت مايبيله بعد ياروح مابعدك روح لاعندي واسطة اتعالج بره، فمالي الا مستشفى خاص نطوف قسط مايهم المهم الصحة وجذيه سويت وهناك تدري شنو سبب الالم اللي فيني.
قلت:  اكتشفوا بالاخير.
قال: ايه بفلوسي اكتشفوا ان سبب عوار الخاصرة هو الثوم اللي اكله على الريج عشان يحميني من الامراض ولكنه سبب لي غازات هي مصدر العوار.
قلت: وشللي حادك على اكل الثوم على الريج الله يساعد ربعك بالشغل.
قال: اللي حدوني هالمسجات اللي توصلنا.
قلت: وانت تصدق كل شي، مااطول وهو يسولف اندمجت اشوف فيلم هندي بالتلفزيون المعلق وكان الفيلم حزين البطل رباه واحد بمعبد واشتغل شرطي واخوه رئيس عصابة، قبل طبعا لا يعرف ان هذا اخوه والاثنين يحبون وحدة ويتنافسون عليها الكل يبي يفوز بقلبها وطبعا لازم الاغاني والتمر قد علي الرمل بالماي وبالاخير يصيد الشرطي رئيس العصابة بعدما يمسك هالحبل من تحت الطيارة ويتسلق هالجبل ليما يوصل للتواير ويدخل من تحت الطيارة ليما الكبينة ويتهاوشون والطيارة تطيح جنب بيت الام ولكنها قبل لاتوصل الارض يطبون منها على كومة قش وتصرخ الان لا تقتله هذا اخوك وتجي حبيبة الاثنين وتتوهق بالمشهد من تختار فيهم المهم الشرطي لازم يقوم بواجبه يقبض على اخوه ويوديه السجن وبعدها يتقدم للزواج من حبيبته اللي تطلع أخته عرفتها امها من شامة بصبعها الصغير وتلتم العائلة بعد فراغ يغنون والفيلم فلة بس حزين خلاني ابجي وبصراحة ما كملته ليما النهاية واللي ذكرته لكم تاليف لان الأفلام الهندية كلها جذيه مثل العلاج بمستشفياتنا الحكومية حسافة على الاجهزة الدكتور الهندي يهتم بالمريض الهندي والدكتود المصري يهتم بالناس اللي من ديرته وكل جناسي الاطباء تخدم اهل بلدها الا الكويتي ماتعرفه او تعرف احد يعرفه يمايهتم مو الكل الاغلبية، وعندنا انواع من الاطباء مايعالجون الا بالبنزين حط علان شكر قلم يمشي، ساعة تقليد هم تمشي واذا دخلت مستشفى وتبي غرفة خصوصي الله يعينك لازم حب خشوم والمشكلة من مدة قريت للنائب والكاتب نبيل الفضل التمييز في ابواب دخول المرضى جنة مايدري او مايعرف ان في اجنحة خاصة جنها سويتات للناس المهمة بالديرة فهذه مانقول عنها تفرقة المفروض دام فيه نقص اسرة يحولون الفي اي بي للمستشفى العسكري ويحول الاجنحة للمواطنين بس قبل كل هذا يجيبون اطباء عندهم ضمير مايخلون الطلبة اللي توهم متخرجين يسون العمليات تحت اشرافه وهو مايجي الا اول شق البطن ويطلع عنده جولة بالاجنحة حق الفي اي بي بس ماتتكلمون عنها، الله يعينك يامواطن،ديرتنا ديرة خير ويجونها من برة يتعالجون بس علاجهم خاص واهل الديرة اذا ماعندهم معارف لهم الله مثل المريض اللي راح للدكتور النفسي وساله شنو مشكلتك قال له والله يادكتور انا احس ان كل الناس تتجاهلني، فلتفت الدكتور على السستر وقال خلاص طلعية برة ودخلي اللي بعده؟

الأحد, 28 سبتمبر 2014

طلعت لك أرض (2-2)

تكمل مقالة الامس بعد ماسألتها عندج غرفة ضيوف.
قالت: ايه اكيد.
قلت: ليش؟
قالت: للضيوف.
قلت:وطبعا انتي مكشختها على الآخر.
قالت: طبعا.
قلت: ليش؟
قالت: شلون ليش للضيوف طبعا.
قلت: وانتي كل يوم يجونج ضيوف؟
قالت:ايه اهلي اهل زوجي صديقاتي.
قلت:كلهم يقعدون بهذه الغرفة.
قالت: لاطبعا الاهل يقعدون داخل غرفة المعيشة.
قلت: ومن عيل اللي يقعدون بغرفة الضيوف.
قالت:صديقاتي او اذا احد غريب زارنا.
قلت: وجم مرة يجونج بالشهر.
قالت: بالشهر ما اعتقد بالسنة يمكن مرة أو مرتين.
قلت: وطول السنة هالحجرة اللي للضيوف مغلقة.
قالت: طبعا.
قلت: بذمتج هذا مو جنون؟
قالت: كل البيوت فيها غرف ضيوف.
قلت: مو هذا الشي مطلب من الحرمة لزوجها اللي تخليه يصرف أكبر مبلغ على غرفة من تأثيث وخلافه هو ممنوع يقعد فيها ومصرح للصراصير والعناكب يسرحون ويمرحون فيها.
قالت: صحيح.
قلت: يعني هذا اعتراف بالغلط.
قالت: ومن فينا كامل بس انت مسكت غرفة الضيوف ونسيت الدوانيات اللي يتمسك فيها بعض الازواج ويخسر عليها مخاسير وممنوع نقعد فيها وهي للجنجفه والمكان السري للسوالف بالموبايلات والستلايت اكمل والا اسكت.
بصراحه عطيتها ظهري ومشيت من غير جواب او سؤال.
بس حقيقة وخاصة للي بيبنون بيوتهم انا اسمع وايد قصص تقول لو ان الرجال شاوروا حريمهم وخالفوهم جان هم مرتاحين لاديون ولاهم يحزنون «بالسيف سايد» ناسين هالرجال ان اغلبيه هالحريم عندهم ذكاء اكثر من الرجال، فخل عقلك براسك تعرف خلاصك ونصيحه كلنا نتمنى نسكن قصور بس مو كلنا نملك، فليش نعاني من الديون البيت مو بفخامته يصير حلو بالعكس بالبساطه فابنوا بالمعقول ادري انكم تدرون مع الدعم الحكومي اللي بقيتوه عون، صار عليكم فرعون لان كل شي صار نار غير نصب المقاولين بحجه المسافات البعيده، فمدوا ريولكم قد الحافكم لاتطالعون غيركم تفلسون ومكه مانبنت بيوم انتو سكنوا بالاول وبعدين كشخوا بالتاثيث وخلافه، تبي جاكوزي اشفيه الحوض المربع وليش حوض السيراميك يكفي ولا اقولكم طشت وطاسه ياتسبحنا بتب ولا طشت اف بالصيف روعه مو ماي يصلخ؟

الخميس, 25 سبتمبر 2014

طلعت لك أرض 1-2

سالت زوجة صاحبي لانهم متزاعلين عن سبب الزعل وأنا أدري السبب البنيان، بيت العمر وغصب وصل دورهم.

قالت: مع احترامي لك واذا تبي الصراحة الرياييل ما عندهم عقل يحبون يسيطرون وتكون الكلمه كلمتهم على اساس ان هم ملائكة ما يغلطون .. يا ما حريم انصحوا رياييلهم ووصلوهم للمجد مو في مثل يقول - وراء كل عظيم امراة.

قلت: كلامك صح بس هذا مايمنع ان الغلط وارد والعناد بين الازواج.

قالت: يحسبني غبيه يتبع  المثل شاورها وخالفها.. شخباري.

قلت: ليش هو شاورك بالبنيان وخالفك.

قالت: بعد ماطالعتني بحقد دفين .. وقالت يعني ماتدري عن صاحبك واسراره  عندك يعني ماتعرف شلون نتف نفسه بالديون والسبه البيت

قلت: بعد بنيان والمثل يقول إذا بتدعي على احد ادعي عليه بالبنيان يلعن سلسفيله؟

قالت: بس صاحبك يلومني مع ان مايسمع شورتي مو بس هو  اغلب الازواج الحين المديونيين يقولون ان حريمنا هم السبب لانهم يتنافسون ببيوتهم .. بعد الشقق يبون يبنون قصور عيال فقر.

قلت:  لان ازواجهم يحبونهم ينفذون اوامرهم وطلباتهم مايفكرون بلعواقب.

قالت: بعصبيه فكني زين ليش انت مثلهم ماسكين علينا، المرأة بنص وهم الكاملين والكامل الله فاذا هم عقولهم كامله ليش يطيعون حريمهم ليش ما يحاولون يقنعون الحرمه ويقعدون يدرسون المواضيع قبل التنفيذ وكل دراسة لازم تكون لها نتيجة.

قلت: وهل كل الحريم يرضون باللي تقولينه؟

قالت: لا طبعا اصابعك ما هي سوا فاذا الرجل مخدي وغبي ، الحرمه السنعه لازم تفهمه والعكس عشان الحياة الزوجيه مشاركه والتشاور حلو.

قلت: خليني اسألج سؤال.

قالت: وانت كل هالمده اشقاعد تسوي؟

قلت: عفوا لا هالسؤال عنج انتي.

قالت: تفضل.

قلت: عندج بيت؟

قالت: طبعا.

قلت: فيه غرفة للضيوف؟

قالت، الا أقول لكم المقاله طالت باجر اكملها باي باي؟

الإثنين, 22 سبتمبر 2014

دريول تاكسي 2-2

قال: يا أني اكره هالناس اللي مثلك حاسدين الفقير يبا حنا كنا لحالنا نترزق وشاركونا برزقتنا شركات وفنادق قطعوا ارزاقنا ننطر طول اليوم جود نحصل زبون او اثنين ورانا عيال.

قلت: عيل ليش موعاجبينك الناس اللي تبلع وتأكل ولا تبي احد غيرها ياكل؟

وقال: الانسان، موعنده حلج وبلعوم، ويقدر ياكل ويبلع، شللي يمنع

قلت ليش تتشكى.

قال: حاريني شوف من ميزانية التنمية جم بينبلع مو حنا خرده، هم الاف اذا مو ملايين بس تدري اكل يااخي انا أشجع هالناس لأني اعتبرهم ابطال، اللي يسوي شغل جايد، يكون أكله جايد ولازم ما نخاف من هالنوع اللي ياكل، لازم نخاف من اللي يقول انا ما آكل وما يشتغل هذا غلط، الكل لازم يعرف حدوده، والا الدنيا تصير خربوطة.

قلت حجي في مسؤول خليجي زار صديقه الاجنبي وتعجب يوم شاف ان حالته الكسيفة تسنعت،البيت بو دور صار فيلا سنعة وحمام سباحة وسيارات كشخة، فساله شلون صرت غنن ورثت ورث من عمك اللي بالبرازيل ضحك الاجنبي واخذة الاجنبي من يده للشباك وقال له شفت المجمع السكني هذاك انا بنيته وربحت منه 4 ملايين.

قال الخليجي وجم ميزانية المشروع.

الاجنبي 55 مليون بس.

المهم دارت الايام وزار الاجنبي بدعوة رسمية المسؤول الخليجي وانصدم لما شاف الاجنبي صاحبه الخليجي يسكن فيلا الفوخمسمية متر كلها رخام وقراج الف متر سيارات كل وحدة تقول الزود عندي فساله شللي غير احوالك من بيت حكومة لهالفيلا فضحك الخليجي وقال: تعال معاي للشباك وقال له شفت هالارض بسوي فيها مركز رئيسي لمحطة قطار والسكك هالمشروع الله يسلمك ميزانيته مليار.

فقاطعه الاجنبي وقال متي بتنفذه ووجم بيكون ربحك.

قال الخليجي وهو يضحك وكرشه يتخضخض قال ربحي مليار والمشروع نفذته اذا بتشوفه موجود بدرج مكتبي؟

قال: يعني شنو وهو يوقف عند بيتي.

قلت هذول اللي ياكلون قول لي جم حسابك؟

قال: اربع دنانير.

عطيته 5 دنانير وقلت له اكل الدينار من كثر ماقال اكل وياكلون على بالي مدرس عربي قديم انا اكل،امي وابي ياكلون، وعاشت التنمية؟

الصفحة 1 من 21