حاولت أن أتوقف قليلاً عن الكتابة لمعرفة ما يحدث في البلد سياسياً واقتصادياً ، وبعد مدة شفت أن الموضوع مشربك ، وانتظرت بعد مدة قلت لازم أشوف الوضع بشكل أعمق وأوضح جتماعياً وثقافياً ورياضيا ، وبعد مدة ولا الموضوع شكله طويل وما راح يخلص والبلد ضايع ولا تعرف شلون قاعد يمشي !
عقب ما سمعت وشفت إعتصام النواب في غرفهم .. أقصد مكاتبهم ، قلت بس بعد ما يبيله صبر ، وتوني بكتب عن هجمة النواب وحصنهم وسيوفهم وأن اردوغال هجم من الميمنة ، جاني اتصال يبلغني بأن المجلس ( حل ) وأن الانتخابات جريبة والنواب اتركوا غرفهم أقصد مكاتبهم وارجعوا للناس .
قلت تمام ،، الحين لازم ندعم وجوه شابه اللي عندهم فكر ورؤية وطموح ، أعلنت النتائج ولا التغيير ممتاز والشباب اوصلوا ،وعقب الإعلان بساعات ولا الشباب بحضن الشياب وتحت جلباب الشياب ، مجتمعين ويصبون لهم قهوة !
بعدهم ما أقسموا ولا اقعدوا ولا شافوا حتى الكرسي الأخضر ، مداعم يحبون الخشوم .
قلنا ماشي يمكن يتعلمون منهم لين يتمكنون من صب القهوة أقصد يتمكنون من عملهم.
لين زرت المجلس من جم يوم وتفاجأت في مكتب أحد النواب أنهم للحينهم واقفين يصبون قهوة ، وعقبها تأكدت أن السالفة باختصار شديد ما هي إلا مسرحية ويديرهم شخص واحد بالريموت.
